ភ្នំពេញ៖ រាជរដ្ឋាភិបាលបានសម្រេចឱ្យជ្រើសរើសមន្ត្រីកសិកម្មឃុំសម្រាប់ឆ្នាំ២០២៣ ចំនួន ២៥០នាក់ ដើម្បីចុះទៅជួយបច្ចេកទេសផ្នែកកសិកម្មនៅតាមឃុំសង្កាត់។ ក្រោយបញ្ចប់ការប្រកាសឱ្យដាក់ពាក្យកាលពីចុងខែវិច្ឆិកា មានបេក្ខជនចំនួន ៧ ៤២២នាក់ ដែលបានបំពេញតាមលក្ខខណ្ឌ ប៉ុន្តែបេក្ខជនដែលត្រូវបានអនុម័តឱ្យចូលរួមប្រឡងមានចំនួន ៣ ៣២៩នាក់។
នេះបើតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ ដែលសហការជាមួយក្រសួងមុខងារសាធារណៈ ធ្វើសន្និសីទសារព័ត៌មានរួមគ្នាស្តីពីការប្រឡងប្រជែងជ្រើសរើសមន្ត្រីកសិកម្មឃុំឆ្នាំ២០២៣ កាលពីថ្ងៃទី០៤ ខែធ្នូ ឆ្នាំ២០២៣។
រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានលើកឡើងថា ចាប់តាំងពីដំណាក់កាលផ្សព្វផ្សាយ ទាំងការដាក់ពាក្យ ទាំងការរៀបចំនីតិវិធីនានាសម្រាប់ដំណើរការជ្រើសរើស ប្រឡង និងកំណែប្រឡង សុទ្ធតែត្រូវបានឆ្លងកាត់ការពិភាក្សា និងការគិតគូរពិចារណាយ៉ាងហ្មត់ចត់បំផុតដោយ គណៈកម្មការជំនាញអន្តរក្រសួង ធ្វើយ៉ាងណាធានាដល់ការរៀបចំប្រព័ន្ធជ្រើសរើសមួយដែលផ្តល់ឱកាសស្មើៗគ្នា មាន តម្លាភាព និងមានយុត្តិធម៌។ ជាពិសេសស្របតាមការលើកឡើងរបស់សម្តេចធិបតី «ការជ្រើសរើសមន្ត្រីត្រូវឈរលើគោលការណ៍ «ជាប់ដោយមោទនៈ ធ្លាក់ដោយអស់ ចិត្ត»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានលើកឡើងថា មន្រ្តីកសិកម្មឃុំដែលជ្រើសរើសថ្មី នឹងជួយផ្ដល់ជំនាញបច្ចេកទេសទាន់ពេលវេលាដល់កសិករនៅតាមមូលដ្ឋានឃុំ-សង្កាត់សំដៅលើកកម្ពស់ជីវភាពនិងបង្កើនប្រាក់ចំណេញរបស់កសិករ ដោយ កាត់បន្ថយថ្លៃដើមជាអតិបរមា។
គូសបញ្ជាក់ថា ការប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ២០២៣ នឹងប្រព្រឹត្តិទៅនៅថ្ងៃទី១៧ ខែធ្នូ ឆ្នាំ២០២៣ នៅសាកលវិទ្យាល័យភូមិន្ទភ្នំពេញ។ ចំពោះវិញ្ញាសាប្រឡងនឹងត្រូវបានរៀបចំជា៣ផ្នែកគឺវិញ្ញាសាសរសេរជំនាញកសិកម្ម រយៈពេល ២ម៉ោង វិញ្ញាសាពហុចម្លើយ រយៈពេល ១ម៉ោង ដែលមានរួមបញ្ចូលគ្នានូវ ជំនាញកសិកម្ម និងចំណេះដឹង ទូទៅពាក់ព័ន្ធនឹងរដ្ឋបាលសាធារណៈ មុខងារសាធារណៈ ក្រមសីលធម៌ គណិតសាស្ត្រ ព័ត៌មានវិទ្យា ភូមិសាស្ត្រ និងវិញ្ញាសាសរសេរភាសាអង់គ្លេស រយៈពេល ១ម៉ោង។
បេក្ខជននឹងចាប់ផ្ដើមប្រឡងពីម៉ោង ១២ថ្ងៃត្រង់តទៅ ក្រោមការចូលរួមសង្កេតការណ៍ពីអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា។
គួររំលឹកផងដែរថា កាលពីថ្ងៃទី១៩ ខែសីហា ឆ្នាំ២០២៣ រាជរដ្ឋាភិបាលបានផ្ដល់ការឯកភាពដល់ការ ជ្រើសរើសមន្ត្រីកសិកម្មចំនួន ១ ៦០០នាក់ ក្នុងរយៈពេល ៣ឆ្នាំ ក្នុងនោះ ក្នុងឆ្នាំ២០២៣ ចំនួន ២៥០នាក់ ក្នុងឆ្នាំ ២០២៤ ចំនួន ៨០០នាក់ និងក្នុងឆ្នាំ២០២៥ ចំនួន ៥៥០នាក់ ដើម្បីបែងចែកទៅតាមឃុំ-សង្កាត់ដែលមាន សកម្មភាពកសិកម្មនៅទូទាំងប្រទេស។
សម្រាប់ឆ្នាំ២០២៣ រាជរដ្ឋាភិបាលកម្ពុជារៀបចំជ្រើសរើសមន្ត្រីកសិកម្មឃុំ ចំនួន ២៥០នាក់ ដើម្បីដាក់ពង្រាយនៅតាមឃុំចំនួន ២៥០ ក្នុងស្រុកចំនួន ៨៩ នៃខេត្តចំនួន ១៧។ មន្ត្រីកសិកម្ម ឃុំ-សង្កាត់ទាំងអស់នឹងស្នាក់នៅជាអចិន្ត្រៃយ៍នៅមូលដ្ឋាន ដោយផ្សារភ្ជាប់ការងារនិងជីវភាពផ្ទាល់ជាមួយប្រជាកសិករប្រមូល ព័ត៌មានអំពីស្ថានភាពផលិតកម្មកសិកម្មនៅមូលដ្ឋាន ព្រមទាំងផ្តល់ព័ត៌មាន និងសំណូមពររបស់ ប្រជាកសិករមកក្រសួងដើម្បីពិនិត្យ និងស្វែករកដំណោះស្រាយបានទាន់ពេលវេលា៕
